من اقوى واجمد واجمل برامج انتاج الموسيقى مهما قولت فعلا مش هاديله حقه البرنامج بيحتوى على كميه الات ومولدات اصوات كتيره جدا لدرجه انك ممكن تخترع اله موسيقيه جديده من مولدات الاصوات بمعنى اصح مافيش نهايه لابداعك الا عقلك وفيه ناس كتير من الى بيستخدموه وحتى من قبلى فاكرين ان البرناج ماينفعش يسجل وانه لانتاج المزيكا. بس سر كبير ان البرنامج بيسجل كويس جدا جدا دا يمكن احسن من غيره من برامج اشتغلت عليها زى
(Adobe Audition - Mixcraft - Cakewalk Sonar - Samplitude)
البرامج الى فاتت ديه طبعا قويه جدا فى مجال التسجيل والمكساج بس ينقصها قوه فى مجال انتاج المقاطع الموسيقيه وعن تجربه شخصيه لاكن
FL studio
بتاع كله. طب ايه الى محتاجه علشان يسجل كويس؟
فى انواع كروت صوت فيها خاصيه اسمها ازيو
(ASIO)
والخاصيه ديه بتستخدم علشان تسجل صوت عالى الجوده من غير ماتحتاج لاجهزه خارجيه زى مكسر وغيره
طب والى ماعندهوش الخاصيه ديه يعمل ايه؟
زى انا كده على قد انى جايب كارت صوت كويس بس ساعتها ماكنت اعرف حاجه عن الازيو وصلت لحل فى برنامج تقدر تسميه ازيو وهمى اسمه
(ASIO4ALL)
ده يخلى اى كارت صوت فيه ازيو علشان يسجل كويس . ابتدى ينزل مع اصدرات برنامج اف ال الجديده من اول
FL studio 7.5
والى يدور على النت هايلاقيه ده درايفر مجانى للكل
وبعد كده تعدل اعدادات الاوديو فى برنامج الـــ اف ال والى يلاقى صعوبه ممكن يدخل على موقع شركه اف ال ويسجل ويبقى ليه القدره انه يشوف دروسها وشرحها لطريقه تثبيت الازيو
طبعا فيه برامج تانيه متخصصه فى انتاج الموسيقى زى
Pro Tools
البرنامج ده بصراحه ماقربتش منه غير انى شوفتله شرح ودروس بتبين امكانياته وشكله جامد فعلا وفعلا ممكن يكون اكتر برنامج تخصص بس مشكلته الى مخلتنيش استخدمه ان لازم تشترى ليه اجهزه خاصه وحدات معالجه خارجيه بحيث انه بيستخدم طاقه عاليه فى المعالجه مايقدر اى بروسيسور يقوم بيها ولازم علشان البرنامج يشتغل عندك على الجهاز يكون معاه جهاز زي مفتاح يتحط فى
USB
كضمان انك مشترى البرنامج
برنامج
REASON
الى بيميز البرنامج ده اصوات ألاته الواقعيه الى فعلا لو حد حاول يسجلها من اله حقيقيه مش هايقدر يوصل لصوت البرناج ده
لان الشركه المنتجه ليه بتستخدم طريقه فى التسجيل وتكنولوجيا خاصه بيها بحيث انها تجمع كل الاحتمالات الممكنه لاستخدام الاله
يعنى مثلا كل مستويات الصوت كل تون موسيقى وهكذا وبتستخدم احدث الات التسجيل واشهر الالات الموسيقيه الى ماركتها نادره معروفه بالاسم وصعب اى حد يوصلها
يعنى لو جبت فرقه موسيقيه باغلى الات مش هايطلع الصوت بجمال ونقاء صوت البرنامج ده
البرنامج بتيجى معاه مكتبات اصوات كامله وعاليه الجوده
بس على قد كل المميزات ديه والى لسه فى كتير زى انك تقدر تشوف اسلاك الاجهزه الوهميه الى فى البرنامج لما تلف الجهاز الوهمى او المكسر الوهمى الخاص بالبرنامج وتغير التوصيلات ومخارج الصوت يدوى
بس صعب شويه ومافهوش الــ
step sequencer
الى موجود فى الـــ اف ال ستوديو الى بيسهل شغل كتير علشان كده فى ناس كتير متخصصه بتربط بين الات الريزون والــ سيكونسر فى الـى فى الــــ اف ال ستوديو بس انا مش محتاجه بصراحه الــ اف ال كفايه وزياده
اه ولازم يكون عندك اورج توصله بفتحه الميدى الى فى جهاز الكمبيوتر علشان تعرف تعزف ده بالنسبه للريزون بي اف ال بعزف عليه بى كيبورد الكمبيوتر العادى واسجل الى بعزفه بعد كده اعدل عليه وديه ميزه مهمه جدا
اتمنى اكون وصلت معلومه مفيده لمن يهمه الامر